Crush ni Kathryn na si Dr Kenneth aminadong biglang sumikat

PUSH NA’YAN
ni Ambet Nabus

HINDI naman siguro sumasakay si Dr. Kenneth Hizon sa nakalolokang pagpapakilig ng netizen.

Matapos kasing mag-viral si Kathryn Bernardo nang banggitin niyang first crush ang isang Kenneth noong Grade 2 siya sa isang school sa Nueva Ecija, napakabilis ng netizen sa paghahanap kung sino ito.

At sa napanood naming interview ng TV5 sa isang Dr. Kenneth Hizon, naikuwento nga nitong magkaklase sila ni Kath dati. Medyo na-overwhelm daw siya sa balita lalo’t naging biglang sikat siya pero ayaw din niyang kompirmahing siya na nga ‘yun, dahil baka may iba pang Kenneth.

Pero dahil noong Grade 2 nga ang sinabi ni Kath at sila ang magkaklase, happy naman siya sa nalaman.

Then bigla rin niyang sinabi na ‘first crush’ din niya si Kath dahil maganda at bright ito sa school at minsan din niyang kinagiliwan.

Kaya naman ang mga fan at supporter ni Kath ay kinilig at tila may mga gagawin daw na hakbang para ire-connect sila at magre-start from there.

Malay nga naman natin kung may something nga ang tadhana sa kanila lalo’t 30 ay single pa rin ang doktor.