HATAW! D'yaryo ng Bayan hatawtabloid.com
MA at PA
ni Rommel Placente
SA kanyang panayam sa Fast Talk with Boy Abunda, inamin ni Buboy Villar na nagkaroon na rin ng anak sa ibang lalaki ang dating karelasyon na si Angillyn matapos ang kanilang hiwalayan.
Sa kabila raw ng pagkakaroon ng anak sa iba ni Angillyn ay wala siyang ibang sinabi, at hindi siya nagalit sa nangyari.
“Tito Boy, gusto ko lang po, para sa akin, nakalulungkot mang sabihin, gusto ko rin sana, parang nirerespeto niya rin sana kung ano ako. Kasi siya, Tito Boy, I promise, I swear to God, nirerespeto ko po siya,” pagbabahagi ni Buboy.
Pagkatapos nito ay ibinahagi niya na may naging karelasyon na rin si Angillyn matapos nilang maghiwalay at nagkaroon siya ng anak rito.
“Simula nga noong nagka-anak rin siya sa bago niya, hindi naman po ako nagsalita, Tito Boy.
“Bago po ako nagka-anak, nagka-anak na rin po siya Tito Boy, doon po sa Amerika. Hindi po ako nagalit,” sabi pa ni Buboy.
Siya pa nga raw mismo ang nagtanong sa dating karelasyon tungkol sa bago nitong anak matapos niyang makita ang picture sa story na ibinahagi nito.
Sa kabila ng nalaman ay walang naramdamang galit si Buboy kay Angillyn at sinabing gusto niya lang masagot ng maayos ang mga anak sakaling magtanong ito tungkol sa ina.
“Hindi ako para pakialaman ko po ‘yung buhay niya. Mine-make sure ko lang po, kasi para alam ko rin po ‘pag nagtanong sa akin ‘yung anak ko. Alam ko rin po kung ano ang sasabihin. Hindi po ‘yung parang, ‘Ah talaga? Bago sa akin ‘yun. I didn’t know that,’” paliwanag ni Buboy.
Bukod sa kanyang rebelasyon ay isa-isa rin niyang sinagot ang mga paratang sa kanya ni Angillyn gaya ng hindi niya pagsustento sa kanilang mga anak pati ang umano’y pananakit niya rito, na aniya ay walang katotohanan.
