Marian aminadong sobrang selosa, ‘di palalampasin babaeng dumidikit kay Dong

MA at PA
ni Rommel Placente

INAMIN ni Marian Rivera na talagang selosa siya noon, pero hindi raw siya basta nagseselos ng walang dahilan at walang sapat na ebidensiya.

Kapag may kakaibang feelings siya sa mga babaeng nakakausap o nakakasalamuha ng asawa niyang si Dingdong Dantes ay hindi siya basta-basta mananahimik at deadma lang.

Ayon pa kay Marian, ang babae, hindi basta magseselos kung walang dahilan. Nature raw ng babae iyon.

At siya nga raw, kapag may nakita o napapansin na may isang babae na nagpi-flirt sa mister niyang si Dingdong talagang nagri-react siya.

“My God napakaipokrita niyon. No, no, no for me. Kapag may sitwasyon na nakikita mong alanganin, magre-react ka talaga,” sabi ni Marian.

Ang mali lang daw niya noon, super react agad siya sa mga pinagselosang babae nang hindi muna kinakausap si Dingdong. “Ayun lang, nagre-react agad ako roon sa babae. Dapat pala kay Dong ako nagre-react.”

Walang binanggit na mga pangalan si Marian ng mga babaeng pinagselosan niya noon pero naka-move on na siya at napatawad na ang mga iyon.