HATAW! D'yaryo ng Bayan hatawtabloid.com
ni NIÑO ACLAN
TINIYAK ni Bureau of Immigration (BI) Commissioner Joel Viado na iisa ang dinaang proseso ng dating alkalde ng Bamban, Tarlac na si Alice Guo at dating presidential spokesperson Harry Roque sa paglabas ng Filipinas.
Ayon kay Viado, tulad ni Guo, walang kahit anong naitalang rekord o flight manifest ang lahat ng paliparan sa bansa pati sa mga seaport na lumabas si Roque sa mga daluyang nabanggit.
Kompiyansa rin si Viado, batay sa lumabas na internal investigation, wala isa mang kawani o opisyal ng immigration/port ang nasuhulan nina Guo at Roque para makalabas ng bansa.
Batay sa impormasyong nakalap nina Viado, sa Tawi-Tawi huling namataan si Roque bago tuluyang makalabas ng bansa.
Si Roque ay inisyuhan ng warrant of arrest ng House of Representatives nang mabigong dumalo sa pagdinig na mayroong kaugnayan sa ginaganap na imbestigasyon noon sa Philipine offshore gaming operation (POGO) na sangkot ang kanyang pangalan.
Inilinaw ng Civil Aviation Authority of the Philippines (CAAP), maging sa pagsakay sa isang private jet flight ay kailangang magsumite ng manifesto at flight plan para sa mga magiging pasahero nito kung saan patungong bansa.
Hindi matukoy kung sa Sual Port sa Pangasinan dumaan si Guo at si Roque lalo na’t inuugnay na may relasyon ang dating alkaldeng babae at ang mayor nito.
Bukod dito, nabunyag sa pagdinig na pawang mga fishing vessels ang dumadaong sa Sual Port.
Nabunyag sa pagdinig, isang sindikato ang nasa likod ng paglabas sa bansa ni Guo nang hindi dumaraan sa legal at tamang proseso.
