HATAW! D'yaryo ng Bayan hatawtabloid.com
ni NIÑO ACLAN
TINIYAK ni Senate President Francis “Chiz” Escudero na hindi niya papayagan ang kahit sino para hulihin o arestohin si Senador Ronald “Bato” Dela Rosa loob ng gusali ng senado, may sesyon man o wala.
Inaasahan na kasunod nang ipaaaresto si Dela Rosa ng International Criminal Court (ICC) matapos dakpin ang dating Pangulong Rodrigo Duterte na ngayon ay nasa The Hague, Netherlands at nakatakdang litisin sa kasong Crimes Against Humanity, dahil sa iwinasiwas niyang gera kontra droga.
Ayon kay Escudero ang hindi niya pagpayag ay bilang pagrespeto at kortesiya sa institusyon ng senado.
Binigyang-linaw ni Escudero, hindi ito ang unang pagkakataon kung saka-sakaling isang senador ang hindi pinayagang arestohin sa loob mismo ng gusali ng senado.
Tinukoy ni Escudero na ilan sa mga senador na naharap sa kaso ngunit hindi inaresto sa loob ng gusali ng senado ay sina dating Senate President Juan Pone Enrile, dating Senadora Leila de Lima, Senador Antonio Trillanes IV, Senate President Pro-Tempore Jinggoy Estrada, at Senador Ramon Revilla, Jr.
Ipinunto ni Escudero, tulad ni Trillanes na namalagi sa senado ngunit hindi inaresto bilang pagbibigay galang sa tinatawag na institutional courtesy at hanggang nakakuha ng legal remedy ang senador.
Iginiit ni Escudero, maaaring arestohin si Dela Rosa kung nasa labas ng gusali ng senado.
Inamin ni Escudero, nakipag-usap sa kanya si Dela Rosa at pinaliwanagan na niya ngunit hindi niya lamang maaaring pangunahan ang kanyang legal team sa kanyang mga hakbanging legal.
