Mga artistang bida sa Pepsi Paloma tahimik 

PUSH NA’YAN
ni Ambet Nabus

HINDI rin mahagilap para makuhanan ng pahayag ang mga artistang sinasabing kasama sa movie ni direk Darryl Yap.

Nauna na riyan ang batikang aktres-direktor na si Gina Alajar na sa naturang teaser ay siyang nagbanggit ng name ni Vic Sotto, bilang gumaganap siyang si Charito Solis na noo’y sinasabing naging malapit kay Pepsi.

No comment na muna raw ang ipinarating na reaksiyon ni Mon Confiado na gumaganap naman bilang si Rey de la Cruz, ang namayapa na ring manager-discoverer ni Pepsi at umano’y  orchestrator o kapitan ng usaping “rape” noong mga panahon na ‘yun.

Nandiyan din si Rosanna Roces, na gumaganap daw bilang si Divina Valencia, ang dating sexy actress noong late 60’s and early 70’s na pumukpok ng mikropono kay Rey on national TV. Nagkabangayan sila noon dahil sa isyung “bomba star at porno star.”

Mukhang si Shamaine Buencamino naman ang gumaganap bilang nanay ni Pepsi. Lahat sila ay ‘deadma o wala pang ipinahahayag’ na saloobin hinggil sa ngayo’y legal na laban ng kanilang direktor sa movie.