Seminar vs fake news hikayat ni Pimentel sa PCO para sa Senado

INIMBITAHAN ni Senate Minority Leader Aquilino “Koko” Pimentel III ang Presidential Communications Office (PCO) na magsagawa ng seminar sa mga opisina ng Senado tungkol sa pagsugpo ng fake news.

Ginawa ito ni Pimentel sa plenary deliberations ng 2025 General Appropriations Bill ng ahensiya nitong Miyerkoles, 13 Nobyembre 2024.

“Siguro, if they are very experienced in operating training seminars on how to manage, or correct fake news, out of a sense of corporate social responsibility, we can ask PCO to also train our offices,” sabi ni Pimentel.

Binigyang-diin ng senador ang kahalagahan ng ganitong training para sa fact-checking, lalo na sa panahon ng mga sesyon ng Senado.

“Kasi excited din kami kasi kailangan parati rin kaming tinatanong, kunwari kahit nag-hearing tayo dito, actually they want a real-time fact checking,” dagdag niya.

Ipinahayag ni Pimentel ang kanyang pag-asa na ang seminar ay magbibigay ng mahahalagang kaalaman mula sa PCO tungkol sa kinakailangang teknolohiya, kaalaman, at teknikal na kasanayan na kailangan upang epektibong masugpo ang fake news.

“We need the experience of the PCO—what technology do we need and what knowledge and technical skills do our people need to have? I’m looking forward to that seminar,” aniya.

Nakuha ni Pimentel ang pangako ng PCO kaugnay sa iminungkahing seminar vs. fake news.  (NIÑO ACLAN)