Camille walang nanligaw na artista dahil sa higpit ni John

MA at PA
ni Rommel Placente

SA guesting ni Camille Prats sa Fast Talk With Boy Abunda, na kasama ang kuya niyang si Johntinanong siya kung sino ang first love niya?

Sagot ni Camille kay Boy Abunda, nagsisimula sa letter C. Na ‘yun ay walang iba kundi si Carlo Aquino, na naging puppy love ng aktres.

Kuwento ni Camille, totoong minsan na rin niyang naka-date noon si Carlo, pero napurnada iyon nang pumasok sa eksena ang kuya John niya.

Hindi naman daw niya kino-consider na first love si Carlo kundi puppy love lang.

“Hindi ko naman idinenay, ‘di ba? Hindi ko naman idinenay.”

Pagbabalik-tanaw naman ni John,  magkakasama sila noon nina Carlo at Stefano Mori sa bandang JCS. Wala siyang kaalam-alam na nililigawan na pala ni Carlo ang kanyang sisteraka.

“I can still remember noong nangyayari ‘yung mga moment na ganyan, siyempre, JCS, banda kami.

“Tapos hindi namin alam, pinopormahan pa niyong isa ‘yung kapatid ko. Noong nalaman ko talaga, para kaming mga ‘Wag natin papansinin ‘yan, Stefano, ha?’” natatawang kuwento ni John.

Sey naman ni Camille, medyo na-guilty siya that time, dahil feeling niya siya ang dahilan kung bakit hindi pinapansin ng mga kabanda niya si Carlo.

“Pina-feel niya (John) talaga na ‘Bad trip ako sa ginawa mo.’”

Sobrang protective raw talaga ni John kay Camille na siyang naging dahilan kung bakit wala na siyang naging manliligaw o karelasyong artista.

“Kasi lahat, kaibigan niya. So parang lahat, ‘Bawal nang ligawan si Camille,’ kasi kilala si Kuya,”rebelasyon pa ni Camille.