Vilmanians nalungkot sa krimeng kinasangkutan ni John Wayne Sace

PUSH NA’YAN
ni Ambet Nabus

NALULUNGKOT ang mga kapwa Vilmanian na nagkuwento sa amin hinggil sa kinakaharap na kaso ngayon ng dating aktor na si John Wayne Sace.

Hinuli kamakailan si John Wayne sa salang pagpaslang sa kaibigan sa isang lugar sa Pasig.

Droga umano at isyu ng hindi pagkakaunawaan ang nagsilbing mitsa ng krimen kaya’t nakakulong ngayon ang dating aktor.

Lungkot na lungkot ang mga kapwa Vilmanian na naging close friend pala ni John Wayne noong naging bunsong anak ito ni Ate Vi sa classic and award-winning movie na Dekada ’70.

“Nakakausap pa namin dati iyan. Malambing at hindi lang talaga palasalita. The last time na nakabalita kami tungkol sa kanya ay noong nagsisimula na nga siyang masangkot sa mga isyu-isyu ng hindi pagsipot sa mga taping at shooting hanggang sa manawa na ‘yung mga show na kumukuha at nagtitiwala sa kanya. 

“Nakalulungkot kasi nakita namin ang pagbibinata niyan at ang husay niya sa pagganap. Napunta sa maling landas, sayang,” kuwento pa ng mga kaibigan natin.