HATAW! D'yaryo ng Bayan hatawtabloid.com
MA at PA
ni Rommel Placente
SI Ogie Diaz ang host ng bagong show ng TV5 na Quizmosa na mapapanood mula Lunes hanggang Sabado, 2:30 p.m. after Eat Bulaga. Ang pilot episode nito ay sa October 21.
“Masaya ako kasi..sabi ko nga ito ‘yung tipo ng ano eh..nagba-vlog ako, alam ko kung kailan ako ga-graduate roon, sa vlogging. ‘Pag TV naman hindi mo alam kung kailan ka ga-graduate. Kasi ‘yung vlog, hawak ko, eto hindi ko hawak,” sabi ni Ogie.
Patuloy niya, “Panibago na namang challenge sa buhay. Pero ang tagal ko na rin kasing ginagawa ito. Hindi ko naman siya sinasabing na-master ko na siya, inaaral ko pa rin.
“Mahirap at challenging at the same time exciting.”
Ngayong balik-telebisyon si Ogie, magbabalik din kaya siya sa paggawa ng teleserye? Marami na rin kasi siyang ginawang teleserye before.
“Teleserye, definitely hindi! Nami-miss ko (ang paggawa ng serye), pero hindi na kaya ng katawan ko. Ang dami-dami ko nang ginagawa.
“Nagmi-maintain ako every other day ng vlog sa ‘Ogie dIaz Showibiz Update.’ Pati ‘yung kailangan every six days naglalabas ng one on one interview ko sa isa ko pang vlog. Tapos ginagawa ko pa ito. Tapos may pamilya pa ako.
“Lima ‘yung mga anak ko. Kailangan ko ring asikasuhin, kailangan ko ring makausap, makamusta everyday.
“Kaya, hindi naman lahat ‘yung feeling mo kasi kaya mong gawin, sisingilin ka rin ng katawan mo balang araw. Kaya bina-balance ko lang muna,” wika ni Papa O.
Hindi naman nagsasalita ng tapos si Papa O na hindi na ulit siya aarte sa harap ng kamera.
“Hindi naman. Bibigyan ko pa rin naman ng chance. At saka mahirap magsalita ng tapos.
“Pero ang nakatutuwa, may demands. Doon ako natutuwa na kahit hindi ko tanggapin (offer sa teleserye), ilang beses na akong tumanggi.
“Alam mo ‘yung ‘ay may asim pa rin? ‘Yung katotohanang may asim ka pa rin, malaking bagay sa akin ‘yun.
“Hindi ‘yung ‘hala wala nang nag-aalok sa akin. Wala na yatang may gusto sa akin. Laos na yata ako,’l aniya pa.
