Cristy pinalagan mga nagbabanta kay MTRCB Chair Lala

MA at PA
ni Rommel Placente

DAHIL sa pagpapataw ng MTRCB (Movie and Television Review and Classification Board) ng 12-day suspension sa Kapamilya noontime program na It’s Showtime, may nagpapadala ng death threats sa chairwoman ng nasabing organisasyon na si Lala Sotto.

Pero pinalagan sila ni Cristy Fermin.

Sa pamamagitan ng vlog nito na Showbiz Now Na ay binalaan nito ang mga nagpapadala ng death threat kay Lala.

Sabi ni Cristy, “Alam niyo po, ‘wag po tayong nagbibitiiw ng mga salita na ganyan. Alam niyo po, matakot tayo, mapagbiro ang panahon. Baka mamaya po, sa atin bumalikwas ‘yang mga pinagsasasabi natin.” 

Humanga naman si Cristy sa katatagan at pananatiling tahimik ng MTRCB chair sa kabila ng matitinding patutsada sa kanya ng kanyang detractors.

“Buti na lamang napakalawak ng pag-iisip at mawalak ang puso ni chairwoman Lala Sotto.

“Nakahihiya. Ang lalakas ng loob niyong magsabi na mamatay na sana ang pamilya Sotto pero ang picture niyo tissue. Naku! ‘wag po kayong kasing tapang ng kapapanganak na tigre. Matatapang kayo? Huwad ang katapangan ninyo. Head on kay chairman Lala Sotto, magpakita kayo ng mukha. Hindi po ‘yung ganyan. Peke po ‘yung katapangan ninyo.” diin pa niyang sabi.