Nadine ibinahagi FAMAS trophy kay Christophe Bariou

MA at PA
ni Rommel Placente

SA ginanap na 71st FAMAS Awards Night noong Linggo ng gabi. August 13, sa Manila Hotel ay si Nadine Lustre ang itinanghal na Best Actress para sa pelikulang Greed ng Viva Films.

Inialay ni Nadine ang kanyang best actress trophy sa kanyang pamilya, boyfriend na si Christophe Bariou, mga kaibigan, at sa home studio niya, ang Viva Films.

Nagpasalamat din si Nadine sa Greed director na si Yam Laranas sa pagtitiwala sa kanyang kakayahan bilang aktres.

Si Noel Trinidad naman ang nag-uwi ng Best Actor trophy para sa pelikulang Family Matters. 

Napahaba ng acceptance speech ni Noel kaya pinatunog ang bell. Tinapos ng beteranong aktor ang pagsasalita, pero muli siyang bumalik para pasalamatan ang kanyang asawa na si Laly Laurel, na nalimutan niyang banggitin.

Best supporting actor ang Reroute star na si Sid Lucero at si Nikki Valdez ang Best Supporting actress para rin sa Family Matters. 

Present ang apat sa FAMAS kaya personal nilang nakuha ang kanilang awards.