Ara wala ng oras sa asawa

MA at PA
ni Rommel Placente

DREAM come true para kay Ara Mina na magkaroon ng sariling show via Magandang ARAw, na ang pilot episode ay sa July 15, Saturday, 3:00-4:00 p.m..

Kaya naman hindi niya napigilang mapaiyak sa media launch nito, na ginanap noong Friday.

“Sabi ko sana someday magkaroon ako ng ganyang show at eto na nga, after 30 years natupad na ang pangarap ko” sabi ni Ara.

Sobrang nagpapasalamat si Ara sa NET 25 management, sa presidente ng estasyon na si Caesar Vallejos at Wilma V. Galvante, na content consultant, dahil tinupad ng mga ito ang childhood dream niya.

Nagpapasalamat din ang aktres sa mga kaibigan niya sa press na patuloy na sumusuporta sa kanya mula noong nagsisimula pa lang siya sa showbiz at hanggang ngayon.

“Huwag na huwag ninyong kalimutan ang mga taong unang nakatulong sa inyo noong nagsisimula pa lang kayo sa career ninyo no matter what,” sabi ni Ara.

Patuloy  niya, “Natutuwa ako kasi nandito kayo, sabi ko hindi lang media launch kasi nami-miss ko ‘yung dati na naging part kayo ng career ko for 30 years, sa buhay ko. Kaya hindi puwedeng wala kayo rito.”

Sobrang hands-on si Ara sa kanyang show. Kaya naman hindi lang siya basta host dito. 

“To be honest may mga kasama ako pero minsan TC (talent coordinator), minsan location manager, writer, may episode na ako ang direktor,  at minsan cameraman.

“Kasi sinasabi ko kung anong anggulo ang kukunan. Talagang umiiyak na ako minsan.

“Hindi pala madaling gumawa ng show na sabi talk show lang ito, pero hindi ganoon kadali. Sobrang madetalye pati editing nakikialam ako.

“Sorry ha naging emosyonal ako, kasi finally na-launch na ito. Kasi sobrang effort ako sa show na ito, ang dami kong natutunan.

“Wala na po akong time sa asawa ko, kasi madaling araw kung umuwi ako tapos pagdating ko (bahay) busy pa ako sa cellphone ko kung ano ang ipi-preview kong episode.

“Tapos magbo-voice over ako sa telepono, tapos ipapasa pa ako, maghahanap pa ako ng location, magpapa-revise pa si Tonipet (Exectuvie Producer), tapos magpapa-revise pa si tita Wilma.

“Buti na lang supportive ang asawa at anak ko, si Mandy, kaya sobrang pasalamat ako talaga sa kanila,” anang aktres.

Sa pilot episode ng Magandang ARAw ay si Piolo Pascual ang guest hanggang sa second episode.