Ricky na-excite sa pagsasama nila ni Gina sa Monday First Screening

MA at PA
ni Rommel Placente

NOONG Lunes, June 12, ginanap sa EVM Convention Center ang star-studded na red carpet gala premiere ng kauna-unahang NET25 Films feature film production na Monday First Screening, na bida at magkatambal sina Ricky Davao at Gina Alajar.

Present sa gala premier sina Film Development Council of the Philippines Chair Tirso Cruz III, Quezon City Mayor Joy Belmonte, at mga nagniningning na celebrities para masaksihan ang romantic-comedy ng mga senior citizen.

Pero bago ang gala premier ay nagkaroon muna ng media conference.

Tuwang-tuwang ibinahagi ng cast ang kanilang pasasalamat sa oportunidad na ibinigay ng NET25, lalo na’t parte sila ng kauna-unahang pelikula na inilabas ng network.

Ibinahagi ni Gina ang maganda niyang karanasan sa pagtatrabaho sa NET25 Films.

“Of course, NET25, thank you so much. Mga tao, mga staff, napakabait! Napaka-welcoming,” sabi niya.

Sabi naman ni Ricky, na wala naman kasi sa edad ang pagmamahal at ibinahagi ang kanyang excitement na makatrabaho si Gina. 

“Halos pareho naman kami ni Gina. Noong nabasa namin iyong material, wow! Sa age namin, gagawa kami ng love story. So roon pa lang, kakilig-kilig na. Tapos, knowing that I will be working with Gina Alajar, who is a dear friend. I’m a fan of Gina. Walang bolahan ito, but when I heard na kaming dalawa, talagang ninerbiyos ako at sobrang na-excite because ang sarap naman makatrabaho ng mga artistang katulad ni Ms. Gina Alajar.”

Bukod kina Gina at Ricky, kasama rin sa pelikula ang mga award-winning actors na sina Ruby Ruiz, Soliman Cruz, Che Ramos, at David Shouder, kasama ang tambalan nina Allen Abrenica at Binibining Pilipinas 2023 2nd Runner Up na si Reign Parani. Mula ito sa direksiyon ni Benedict Mique.