Xian iprinisinta ang sarili para makapagdirehe

MA at PA
ni Rommel Placente

MAPAPANOOD na sa Lunes, March 13, 8:50 p.m. sa GMA Telebabad ang Hearts On Ice, ang figure skating drama series na pinagbibidahan nina Xian Lim at Ashley Ortega. Ito ang unang serye ni Xian sa Kapuso Network.

Sa Hearts On Ice, gaganap si Xian bilang si Enzo, isang cold-hearted at may pagka-arogante.

Bago sumalang sa nasabing serye ay nag-training muna ng figure skating ang gwapong aktor at may coach pa nga siya sa serye.

“Kaya sabi ko, ‘Sige, mag-training tayo.’ So, we’re really preparing for the time that I get to a certain level na. I did post in Instagram our journey in ice skating. May mga level po kasi ‘yan. There’s five basic levels,” sabi ni Xian.

Patuloy niya, “So finally, noong nakuha ko na ang certificate, puwede na kaming magsama ni Ashley sa ice.

“Because mahirap naman po na isasabak na kami agad at masagasaan namin ang isa’t isa,” katuwiran pa ni Xian.

Hindi lang ang paggawa ng serye ang gustong gawin ni Xian sa GMA 7. Gusto niya ring makapagdire. Kaya naman naglakas-loob siya na nagprisinta sa Kapuso Network na makapagdirehe ng drama series.

“Ipiniprisinta ko talaga ‘yung sarili ko kasi wala naman hong gagawa niyon kundi ako.

“I think… ‘yun pong isa sa mga natutunan ko na, wala namang ibang magbubuhat ng bangko kundi ang sarili mo.

“I really do tell them that I say my intention, na gusto ninyo po want to try me as a director, then I would gladly, with all my heart do it,” napapangiting sabi pa ni Xian.

Bukod sa Hearts on Ice, ipinarating na rin ng GMA management kay Xian na puwede na niyang ipagpatuloy ang Love. Die. Repeat, na pagtatambalan naman nila ni Jennylyn Mercado.