HATAW! D'yaryo ng Bayan hatawtabloid.com
NANAWAGAN si vice-presidential aspirant Francis “Kiko” Pangilinan nitong Lunes para suspendehin ang programa ng gobyerno na naglalayong tanggalin ang mga jeepney na 15 taon nang ipinapasada.
Ayon kay Kiko, ito ay bilang tulong sa mga tsuper at mga operator na hindi pa man nakababawi, ay halos linggo-linggo nang ‘pinipilay’ ng pagtataas ng presyo ng produktong petrolyo.
“Ipagpaliban muna ang pagpapalit ng lumang dyip. Hirap na hirap na ang ating mga tsuper at operator. Di pa nga nakababawi dahil wala o kulang ang pasahero noong lockdown. Ngayon naman, sunod-sunod ang pagtaas ng presyo ng krudo,” ani Pangilinan.
“Kawawa naman ang ating mga tsuper. Gusto naman nilang magtrabaho. Huwag natin silang pigilang maghanapbuhay. Hayaan muna nating makabawi sa sunod-sunod na mga krisis ang ating transportation frontliners,” dagdag ng vice presidential aspirant.
Ang pahayag ni Pangilinan ay pagpapakita rin ng suporta sa posisyon ng kanyang tandem na si presidential candidate Leni Robredo sa nasabing isyu.
Nauna rito, sinabi ni Robredo, ang puwersahang konsilidasyon ng PUV (public utility vehicle) operators, paggamit ng iisang terminal, at ang sapilitang pagpapalit ng jeepneys ay dapat munang itigil.
“Gusto po natin ang modernisasyon ng ating public transport. Ngunit ayaw naman po natin bigyan ng karagdagang burden ang ating mga pasahero at drivers…Ang pangunahing i-focus po natin ngayon ay maibsan ang kahirapan, ma-revive ang ekonomiya at makontrol ang pagkalat ng CoVid-19. Ang mga polisiyang hindi angkop at consistent sa objectives na ito ay dapat isantabi muna,” ani Robredo.
Sa bahagi ni Pangilinan, pabor siya sa pangako ng Land Transportation Franchising and Regulatory Board (LTFRB) na madaliin ang pamamahagi ng gobyerno ng fuel subsidy para sa operators at tsuper ng public utility vehicles (PUVs).
Nanawagan si Pangilinan na ipamahagi na ang fuel subsidy upang pagaanin ang epekto ng walang tigil na oil price hikes.
Sinabi ng LTFRB, ang PUV drivers ay tatanggap ng P6,500 fuel subsidy fund sa pamamagitan ng Pantawid Pasada cards na iniisyu ng Landbank. Ito ang ipakikita att gagamitin ng mga driver sa mga kalahok na gas stations upang ipambili ng petrolyo.
Ang pagdinig ng LTFRB sa mungkahing dagdag P3 to P5 sa pasahe ay nakatkda ngayong araw, 8 Marso 2022. (KARLA OROZCO)
