HATAW! D'yaryo ng Bayan hatawtabloid.com
PATAY ang isang 58-anyos auto-electrician makaraang pagtutusukin ng patalim ng isang matansero sa Malabon City, kamakalawa ng gabi.
Dead on arrival sa Ospital ng Malabon (OsMa) ang biktimang kinilalang si Wilfredo Lasin, residente sa Javier ll, Barangay Baritan sanhi ng maraming tama ng saksak sa iba’t ibang bahagi ng katawan.
Agad naaresto ang suspek sa bahay nito habang naghahandang tumakas na kinilalang si Jerwin Lorenzo, 33-anyos, matansero, at residente sa Luna II St., Barangay San Agustin dala ang ginamit na patalim.
Batay sa ulat ni P/SSgt. Jose Romeo Germinal II, dakong 8:50 pm nang maganap ang pananaksak sa biktima sa tapat ng bahay ng suspek sa nasabing barangay.
Nakaupo umano ang biktima sa nasabing lugar nang biglang dumating ang suspek na armado ng patalim at walang sabi-sabing pinagsasaksak ang biktima nang ilang ulit.
Matapos ito ay iniwan ng suspek ang duguang si Lasin habang nakahandusay sa semento.
Agad tinulungan ng mga tambay sa lugar ang biktima at isinugod sa ospital ngunit ilang minuto lamang ay idineklarang patay ng doktor na si Dr. Calopez Michael Roco.
Nahaharap ang suspek sa kasong murder na kasalukuyang nakapiit sa detention cell ng Malabon City police. (ROMMEL SALES)
