Snatcher, todas (Baril ng pulis tinangkang agawin, pumutok)

ISANG hinihinalang snatcher ang tinamaan ng bala nang pumutok ang baril ng pulis na kanyang tinangkang agawin sa Malabon City, kamakalawa ng gabi.

Ayon kay Malabon police chief, Col. Jessie Tamayao, hindi na umabot nang buhay sa Ospital ng Malabon sanhi ng tama ng bala sa katawan ang suspek na si John Paul Sanchez, 20 anyos, residente sa Kaingin St., M. H. Del Pilar, Barangay Tinajeros.

Sa ulat ni P/SSgt. Jose Romeo Germinal II, dakong 10:25 pm, mina­maneho ni P/SSgt. Leo Lubiano, 41 anyos, nakatalaga sa Malabon Police Sub-Station 2 ang kanyang motorsiklo nang hingan siya ng tulong ni Rossana Santos, 37 anyos, piyansadora ng Katarungan St., Barangay Muzon, makaraang hablutin ng suspek ang kanyang bag sa M. H Del Pilar, Barangay Tinajeros.

Dahil dito, hinabol ng pulis ang suspek na sasakay na sana sa kanyang motorsiklo pero napigilan nang siya ay magpakilalang pulis.

Nang kunin ng pulis ang inagaw na bag, nagkaroon ng pagkakataon ang suspek at bigla na lamang sinunggaban ang service firearm ni Lubiano na naging dahilan upang magpambuno ang dalwa hanggang pumutok ang baril at tinamaan sa katawan si Sanchez.

Matapos ang insidente, mabilis na isinugod ng pulis ang suspek sa naturang pagamutan habang narekober ng mga tauhan ng SOCO na nagresponde sa crime scene ang isang itim na coin purse na naglalaman ng tatlong plastic sachets ng hinihinalang shabu mula sa motorsiklo ng suspek. (ROMMEL SALES)