HATAW! D'yaryo ng Bayan hatawtabloid.com
SINABI ni Senadora Imee Marcos na hindi pa huli ang lahat para baguhin ang kautusan na mandatory o obligado nang magsuot ng face shields ang lahat ng commuters at mga empleyado bukod sa face masks simula sa Sabado.
“Puwedeng localized o voluntary, pero pag mandatory ay overkill na ‘yan. May iba pa bang bansa na nagrerekomenda na sabay gamitin ang face shield at face mask maliban sa loob ng mga ospital?” dagdag ni Marcos.
Ayon kay Marcos, dapat isapubliko ng gobyerno kung sino ang mga importer at lokal na supplier ng face shields at tukuyin ang posibleng koneksiyon sa mga opisyal mula sa mga departamento ng kalusugan, transportasyon, labor, at trade and industry na maaaring kumita sa pagbebenta ng produkto.
“Biglang nagkaroon ngayon ng SRPs (suggested retail prices) para sa face shields, pero walang pormal na guidelines sa publiko para sa tamang kalidad at uri ng produkto para maprotektahan ang mga konsumer. Ilang beses ba ‘yan puwedeng gamitin? Minsanan o puwedeng ulitin, paano lilinisin, ligtas ba ‘yan gamitin at hindi ba madaling masunog ang materyales, ano ang mga pag-iingat na dapat gawin ng mga gagamit?” tanong ni Marcos.
Aniya, mismong United States Centers for Disease Control and Prevention ang nagbabala na ang pagsusuot ng face mask mismo ay maaaring magpalala sa pisikal o mental na kondisyong pangkalusugan, maaaring magbunsod ng medical emergency, o magkaroon ng panibagong problemang pangkalusugan.
“Bukod sa hindi komportable, hindi ba masu-suffocate ang mga may high-blood pressure, sakit sa puso o asthma ‘pag may face shields at mask? Gaano kahabang oras titiisin ng mga manggagawa sa opisina at pabrika ang pagsusuot nito na pahirap pa sa paghinga?” tanong ni Marcos.
“Kung talagang airborne ang virus, wala rin silbi ang paggamit ng face shields na bukas ang mga gilid, lalo sa mga lugar na sarado at nare-recyle ang umiikot na hangin,” dagdag ni Marcos. (CYNTHIA MARTIN)
