Anarkiya umiiral sa Customs — Digong

UMIIRAL ang anarkiya sa Bureau of Customs na dapat masawata ng militar, ayon kay Pangu­long Rodrigo Duterte.

Sinabi ng Pangulo sa kanyang talumpati sa Palawan kamakalawa, kaya niya itinalaga si dating AFP Chief of Staff Rey Leonardo Guerrero bilang Customs chief, at nagpakalat ng mga sundalo sa Aduana, ay upang panatilihin ang kapayapaan.

“They are there to keep peace because Cus­toms is an anarchy. Maski sino ilagay mo, talagang may cor­ruption,” ani Duterte.

Nauna rito’y kinom­pirma ng Palasyo na layunin ng Pangulo sa pagtatalaga ng mga sundalo sa BoC ay upang takutin ang mga tiwaling opisyal at kawani na nakikipagsabwatan sa smugglers.

Samantala, hinimok ng Pangulo ang mga turista, negosyante at lokal na opisyal sa Pala­wan na sundin ang batas upang hindi matulad ang isla sa Boracay na isa aniyang “classic case” ng overloading kaya nagka­roon ng sewerage pro­blems.

(ROSE NOVENARIO)