HATAW! D'yaryo ng Bayan hatawtabloid.com
INATASAN ni Pangulong Ferdinand R. Marcos, Jr., ang Inter-Agency Council Against Trafficking (IACAT) at ang Presidential Anti-Organized Crime Commission (PAOCC) na palakasin at pagsamahin ang mga pagsisikap ng gobyerno at pribadong sektor upang labanan ang human trafficking.
“The IACAT and the PAOCC must take the lead in harmonizing government initiatives, public private partnerships to thwart the business of human trafficking in its multifarious operations on the ground and now becoming more and more important online,” sabi ni Marcos sa briefing hinggil sa mga problemang dulot ng human trafficking.
Nagbigay rin siya ng direktiba sa Presidential Communications Office (PCO) na tulungan ang IACAT na maglunsad ng communication campaign na magtuturo sa publiko tungkol sa mga panganib na dulot ng mga sindikatong sangkot sa human trafficking.
Naniniwala ang Pangulo na ang mabuting impormasyon ay laging isang mahalagang elemento sa pagpigil sa lahat ng kakila-kilabot na pang-aabuso na ginawa laban sa mga biktima ng human trafficking.
“So heightened public awareness is key. That’s what we spoke about a little bit earlier. The PCO must assist IACAT in its communication campaign against trafficking in persons in order to amplify the effort,” aniya.
Dapat ihinto ng mga nasabing ahensiya ang operasyon ng mga human trafficker na bumibiktima sa pisikal at ekonomikong kahinaan ng kababaihan at mga bata, ayon sa kanya.
Habang ipinagdiriwang ng mundo ang Pandaigdigang Araw ng Kababaihan nitong Marso, sinabi ng Punong Ehekutibo: “Iginagalang namin ang kababaihan ngayong buwan. Kaya siguraduhin nating maglaan tayo ng oras para pangalagaan ang kanilang mga kolektibong karapatan at interes sa pagpapatupad at sa mga hakbang para malutas ang lahat ng ating ipinapatupad.”
Ang trafficking in person ay isang patuloy na isyu para sa maraming bansa, lalo na’t ang pandaigdigang ekonomiya ay bumabawi mula sa Covid-19 pandemic, na nagpahirap sa buhay ng maraming tao, ani Marcos, Jr.
Aniya, ang kawalan ng trabaho ay salik para maging mas mahina ang isang taong biktima sa mga human trafficker, at ito na ang panahon para sa interbensiyon at proteksiyon ng gobyerno.
“I think the room for improvement here is that we can work together more and coordinate together more and where – that puts meat on the bones of what we have come to call the whole-of-government approach and bring everything to bear to the problems that we are facing,” anang Pangulo.
Mapalad, ayon kay FM Jr., na naibalik ng bansa ang mga biktima ng human trafficking mula sa Myanmar sa kabila ng patuloy na kaguluhang sibil sa naturang bansa.
Iginiit ng Pangulo ang pangangailangan para sa Filipinas na mapanatili ang katayuan nito sa tier system, na nagsasabing “dapat nating tiyakin na hindi tayo mahuhulog sa Tier 1 sa isa pang antas.”
Ang Trafficking in Persons Office sa loob ng US Department of State ay nagsasagawa ng taunang pagtatasa upang subaybayan ang lahat ng pagsisikap ng mga bansa na labanan ang human trafficking at magtalaga ng grado sa bawat bansa sa 3-tier na sukat.
Ang mga bansa at teritoryo ng Tier 1 ay ganap na sumusunod sa mga minimum na pamantayan, habang ang mga bansa at teritoryo ng Tier 2 ay hindi ganap na sumusunod sa mga minimum na pamantayan ngunit gumagawa ng makabuluhang pagsisikap na gawin ito. (ROSE NOVENARIO)
