HATAW! D'yaryo ng Bayan hatawtabloid.com
NASILIP namin ang Friday episode ng programang Asintado nina Julia Montes at Shaina Magdayao kasama sina Lorna Tolentino, Nonie Buencamino, Agot Isidro, Ryle Santiago, Desiree del Valle, Aljur Abrenica at iba pa.
Pareho na palang nagsisilbi sa bayan sina Nonie bilang gobernador ng Bulacan at mayora naman ang asawang si Agot na hindi pa annulled ang kasal.
Nagpupuyos sa galit si Lorna dahil hanggang ngayon ay hindi pa niya nagagamit ang inaasam-asam niyang maging opisyal na Mrs. Del Mundo dahil hindi naasikaso ni Nonie ang annulment nila ni Agot.
Kaya naman sa courtesy call ng mga mayor sa gobernador ay muling nagkabanggaan sina Lorna at Agot dahil nang kapanayamin ng reporters si Nonie kung ano ang masasabi niya sa pagkapanalo ng tunay na Mrs. Del Mundo ay sinabi niyang natutuwa siya dahil nakatulong ang mga natutuhan nito sa kanya.
Mukhang may ibang plano si Agot dahil sinabi niya na kulang pa ang mga natutuhan niya at kung puwede ay turuan pa siya ng asawa pagkatapos ng office hours.
Humiling ang reporters ng picture taking nina Mr. and Mrs. Del Mundo at pumuwesto si Lorna at sabay hawak kay Nonie pero sinupalpal siya ni Agot, “what are you dong? Ang sabi Mrs. Del Mundo ako ‘yun.” Kaya walang nagawa ang common law wife kundi tumabi at halatang may maitim na balak.
Ngayong araw, Lunes ay dudukutin ni Lorna si Julia nang magpang-abot sila sa sementeryo para dalawin si Gael (Paulo Avelino) dahil may karapatan siya bilang asawa bagay na ayaw pumayag pa rin ng una kaya sinaktan niya at inakalang buntis siya.
Pilit na pinaamin ni Lorna si Julia kung buntis siya sa anak nitong si Paulo pero itinanggi ito kaya kaya tinutukan ng una ng baril si Ana (Julia).
Sa mga serye ng ABS-CBN ay nasa ika-limang puwesto ang Asintado na may 517,959 views sa IwantTV at lahat ng komentong nabasa namin ay nami-miss na nila si Gael (Paulo) at galit na galit sila kay Miranda (Lorna). Siyempre kontrabida ang karakter ng aktres alangan namang matuwa ang manonood.
Nanatiling mataas ang ratings ng Asintado dahil nakaka-pitong buwan na ito at mahaba pa ang takbo ng kuwento.
Rater talaga si Julia Montes, ‘di ba ateng Maricris?
FACT SHEET
ni Reggee Bonoan
