HATAW! D'yaryo ng Bayan hatawtabloid.com
ITATAYA ng Cafe France at UP QRS/ JAM Liner ang kanilang malinis na record sa hangaring makaagapay sa liderato sa 2016 PBA D-League Aspirants Cup mamayang4 pm sa Ynares Center sa Pasig City.
Sa unang laro sa ganap na 2 pm, magkikita naman ang Mindanao Aguilas at Tanduay Light na kapwa wala pang panalo matapos ang dalawang laban.
Ang Cafe France, na naghahangad na maibulsa ang ikalawang sunod na titulo matapos mamayagpag sa nakaraang Foundation Cup, ay nagposte ng back-to-back na panalo kontra sa Mindanao Aguilas (89-65) at BDO-National University (110-86).
Dinaig din ng Fighting Maroons ang BDO-NU (90-85) at isinunod ang Tanduay Light (102-86).
Hawak ni coach Edgar Macaraya, ang Cafe France ay pinalakas sa pamamagitan ng pagdagdag kina Bryan Cruz, Jess Mar Villahermosa at Paul Zamar. Kabilang sa mga datihang inaasahan ni Macaraya sina Rodrigue Ebondo, Samboy de Leon at , Jamison Cortez.
Ang UP QRS JamLiner ni coach Bert dela Rosa ay kinabibilangan ng mga Figthing Maroons na sina Diego Dario, Dave Moraldez, Paul Desiderio at Andrew Harris, Naidagdag sa line-up sina Kevin Ferrer, Alfred Batino at Kyle Neypes.
Umaasa si Tanduay coach Lawrence Chongson na makakabangon ang Rhum Masters sa masamang simula. Kabilang sa mainstays ng Tanduay sina Ryusei Koga, Joseph Eriobu Jr. Adrian Santos at mga ex-pros na sina Narciso Llagas, Jaypee Belencion at Rudy Lingganay.
Ang Aguilas ni Nino Rejhi Natividad ay pinamumunuan nina Gino Jumao-as, Kenneth Acibar, Mark Sarangay at JR Ongteco.
( SABRINA PASCUA )
