PNP official nabiktima ng ‘basag-kotse’ sa Marikina

TINANGAY ang passport at dalawang mamahaling mobile phone ng isang mataas na opisyal ng PNP-PRO-4A ng kilabot na ‘basag-kotse’ habang nakaparada sa lungsod ng Marikina, nitong Miyerkoles ng umaga, 19 Pebrero.

Kinilala ang opisyal ng pulisya na si P/Col. Roland Bulalacao na nakatalaga sa Calabarzon.

Ayon sa ulat ng mga awtoridad, dakong 11:00 am kamakalawa nangyari ang insidente hindi kalayuan sa PNP Headquarters sa G. Fernando Ave., kanto ng Lark St., Barangay Sta. Elena, sa naturang lungsod.

Nabatid na nakatakas ang dalawang suspek sakay ng Yamaha Mio motorcycle tangay ang mobile phones ng biktima at passport na inisyu ng Department of Foreign Affairs (DFA) nang mam­ataan ang mga awtoridad na nagpapatrolya sa lugar.

Nagsasagawa ng manhunt operation ang Marikina PNP at nirerebisa na rin ang CCTV camera sa lugar upang matukoy at maaresto ang mga suspek na kumulimbat sa gamit ng opisyal. (EDWIN MORENO)