Ogie Diaz bakit nga ba hindi ibinoto sina Ipe at Willie? 

MA at PA
ni Rommel Placente

NAIMBITAHAN ang talent manager at vlogger na si Ogie Diaz sa online show na Facts First Tonight with Christian Esguerra para pag-usapan ang nagdaang eleksiyon.

Dito ay inamin ni Ogie na hindi niya ibinoto ang mga kasamahan sa showbiz na sina Willie Revillame at Phillip Salvador sa pagka-senador.

Sabi ni Ogie, “‘Yung mga walang plano, ‘yung saka lang magpaplano o magkakaroon ng plataporma kapag nanalo na, binibigyan ko ng idea ang followers ko, na huwag iboto ‘yung mga walang plano, ‘yung mga masyado lang nagre-rely sa kasikatan nila,” sabi ni Ogie.

Kaya kahit kasamahan sa industriya ay hindi nga raw ibinoto ni Ogie sina Phillip at Willie.

Feeling niya rin naman ay walang magagawa sina Ipe at Willie kung magiging senador ang mga ito dahil ang senado raw ay gumagawa ng batas.

Sa kabilang banda, happy si Ogie na nakapasok sina Bam Aquino at Kiko Pangilinan sa pagka-sendor kasi sila raw ‘yung mga pinu-push niya talaga na manalo dahil alam niyang wala ang mga ito sa lumalabas na survey bago ang eleksiyon. At alam naman niyang maraming maipapasang batas ang mga ito.