HATAW! D'yaryo ng Bayan hatawtabloid.com
NANINIWALA si Pamilya Ko Partylist (PKP) 1st Nominee Atty. Anel Diaz na malaki ang naitutulong ng ayudang ipinagkaloob ng pamahalaan sa mga mamamayan ngunit hindi dapat na dito lamang umasa dahil hindi ito sostenible o kayang panatilihin sa mahabang panahon.
Iginiit ni Diaz, dapat ang ayuda ay tutugon sa long term plan katulad ng pagbibigay ng mga livelihood program upang magkaroon sila ng kabuhayan at palalakasin pa ang employment opportunities sa bawat mamamayan.
Tinukoy ni Diaz, isang magandang halimbawa na tulad ng Taytay na kilala sa wood works at garments.
Kung kaya’t tiniyak ni Diaz na sandaling maupo sila sa kongreso ay kanilang paglalaanan ng karagdagang pondo ang Taytay, Rizal upang lalo pa nitong mapalago ang kanilang mga woodwork at pagiging garments industry capital.
Binigyang-diin ni Diaz, dapat ay maging balanse ang dalawa lalo na’t hindi naman agarang nararamdaman ang epekto ng Livelihood.
Ang PKP ay nag-ikot sa Barangay Sta. Ana, Taytay Rizal kasama si konsehal Arky Manning at PKP 2nd nominee Miguel Kallos.
Aminado si Manning na lubhang napakalawak ng mga problema na kinakaharap ng Taytay at isang positibong aksiyon ang ginagawa ng PKP upang matulungan lalo ang mga miyembro ng ‘modernong pamilya’ na kadalasang nahaharap sa iba’t ibang uri ng problema.
Idinagdag ni Manning, ang kakulangan ng edukasyon, ang kakulangan ng trabaho, at maayos na kalusugan ang ilan sa mga problemang kinakaharap ng mga mamamayan.
Sinabi ni Kallos, nais nilang mahikayat at isama ang lahat ng pamilya lalo ang mga nabibilang sa ‘LOVABLES’ at upang maiangat ang kanilang kalagayan. (NIÑO ACLAN)
