HATAW! D'yaryo ng Bayan hatawtabloid.com
DINAGSA ng mahigit sa 10,000 mamamayan mula sa 38 barangay ng lungsod ng Taguig kasama ang 10 EMBO barangays ang proclamation rally na isinagawa ng Team Lani Cayetano (TLC) sa Arca South.
Hindi mapigil ang hiyawan at sigawan ng mga sumaksi sa pagdiriwang sa bawat pagpapakilala at pagsasalita ng bawat kandidato ng Team TLC.
Kasama ni re-electionist Mayor Lani Cayetano sina re-electionist Vice Mayor Arvin Arlit, Liga President Jorge Bocobo na tatakbong kongresista para sa Distrito 2 ng Taguig at si re-electionist Congressman Ading Cruz , Jr.
Kasama sa Team TLC ang mga konsehal mula sa Distrito 1 na sina Kim Abbang, Raul Aquino, Allan Cruz, Sammy Cruz, Abogado Darwin Icay, Jimmy Labampa, Totong Manosca, Tikboy Marcelino, Carlito Ogalinola, Atty. Joy Panga-Cruz, Gamie San Pedro, at Ferdie “Bro” Santos.
Samantala, para naman sa Distrito 2 ay sina Konsehal Marise Balina-Eron, Edgar Baptista, Gigi Bermas, Danny Castro, Iony De Lara-Bes, Ivie Dizon, Gen Pau-Tin, Alex Penolio, Ed Prado, Jomil Serna, Nicky Supan, at Bing Villamor.
Pakiusap ni Mayor Cayetano sa bawat dumalo at sa lahat ng Taguigeño na tulungan siyang ipanalo ang kanyang buong team dahil lahat sila ay katuwang niya sa pagpapatuloy sa paghahatid at pagbibigay ng serbisyo sa bawat Taguigeño.
Tiniyak ni Cayetano na kung marami na silang nagawa sa mga nakalipas na panahon ay tiyak na mas marami pa silang magagawa pa sa lungsod at para sa mga mamamayan nito para sa patuloy na pag-unlad ng kabuhayan ng bawat pamilyang Taguigeño.
Lubos ang pasasalamat ni Cayetano sa bawat Taguigeño na nagtiwala, naniniwala at sumuporta sa kanya upang higit niyang magawang maihatid sa bawat mamamayan ang serbisyong kailangan nila.
Pinasalamatan din ni Cayetano ang lahat ng opisyal ng Taguig kabilang na ang mga barangay captain, SK chairman at mga kagawad, mga konsehal, lingkod bayan at mga lider sa nasyonal sa suportang ibinibigay sa kanyang administrasyon. (NIÑO ACLAN)
