HATAW! D'yaryo ng Bayan hatawtabloid.com
ni NIÑO ACLAN
DESMAYADO si United Nationalist Alliance (UNA) Secretary General JV Bautista dahil taliwas sa layunin at intensiyon na itinatadhana ng Saligang Batas ang nangyayari sa party-list system sa kasalukuyan.
Ginawa ni Bautista ay kanyang pahayag sa kanyang pagdalo sa The Agenda Forum sa Club Filipino sa San Juan City kasama si Ret. Col Ariel Querubin.
Ayon kay Bautista, maliwanag ang naging desisyon ng Korte Suprema noong 2023 na nagbigay ng ruling na ang party-list system ay hindi lamang para sa marginalized at underrepresented kung kaya’t naging daan upang upang makapasok lahat ng mga bilyonaryo na gustong pumasok sa kongreso sa pamamagitan ng ‘backdoor’ o sa pamamagitan ng party-list.
Kaya, aniya, huwag magtataka kung bakit corrupted na rin ang party-list na hindi nangyari noong panahon nila. Klaro noong una ang intensiyon ng Konstitusyon at mga gumawa ng naturang batas.
Iginiit ni Bautista, huwag nang magtaka kung bakit maraming ‘clown’ sa ating kongreso dahil sa maling sistema ng pagpili sa ating mga lider.
Bagay na sinang-ayunan ni Querubin na aniya’y dapat tayong matuto at mamulat sa katotohanan sa pagpili ng ating mga lider.
Naniniwala sina Bautista at Querubin na panahon na upang gumising sa katotohanan ang mga Filipino na matutong kilatisin at isulat sa balota ang karapat-dapat maglingkod sa bayan.
Iginiit nina Bautista at Querubin, huwag asahan ng taong bayan ang pag-asang tutuparin ng mga tatakbo ang kanilang pangako dahil ang katotohanan kapag nanalo ay hindi mangyayari. Kaya’t mas dapat isipin at ihalal ng bawat mamamayan ang taong makatutulong upang magbago at maging maayos ang pamumuhay ng bawat Filipino.
Samantala, sa ng pagdiriwang ng EDSA People Power, naniniwala sina Bautista at Querubin na bagamat maluwag na naipapahayag ang ating naisin hindi naman ganap na malaya ang bansa at mga mamamayan mula sa kahirapan, gutom, kawalan ng trabaho, at mataas na presyo ng mga bilihin.
