HATAW! D'yaryo ng Bayan hatawtabloid.com
TIYAK na ikatutuwa ng pamilyang Filipino na panoorin ang apat na pelikula ngayong Linggo na nabigyan ng angkop na rating ng Movie and Television Review and Classification Board (MTRCB).
Ang Thai animated na Out of the Nest tungkol sa isang kambing at pitong nakaaaliw na sisiw, at ang South Korean concert movie na IU Concert: The Winning, ay parehong Rated G (General Audience). Ibig sabihin, puwedeng panoorin ng lahat ang dalawang pelikula.
Ang Firefighters, na base sa totoong insidente noong 2001 sa Hongje-dong, at ang Woodwalkers, na tungkol sa mga bata na nagpapalit-anyo, ay parehong rated PG (Patnubay at Gabay ng Magulang).
Sa PG, pwedeng manood ang edad 12 at pababa na kasama ang magulang o nakatatanda.
Para naman sa mga naghahanap ng aksyon at kababalaghan, swak ang pelikulang Peter Pan’s Neverland Nightmare na rated R-16 at R-18.
Sa R-16 ay mga edad 16 at pataas ang puwede lamang manood. Sa R-18 ay mga edad 18 at pataas.
R-16 at R-18 din ang The Baby in the Basket, dahil sa tema, kababalaghan, at lengguwahe.
Pinayuhan ni MTRCB Chairperson and CEO Lala Sotto-Antonio ang mga magulang na pumili ng mga palabas na tama para sa mga bata.
“Malaki ang ginagampanan ng bawat pelikula sa paghubog ng kaisipan ng ating mga kabataan. Sa pamamagitan ng responsableng panonood, masisiguro natin na bukod sa kasayahang dulot ng pelikula, may mapupulot ding aral ang mga bata sa patnubay ng mga magulang,” sabi ni Sotto-Antonio.
