HATAW! D'yaryo ng Bayan hatawtabloid.com
NAKULANGAN si AGAP Partylist Rep. Nicanor Briones sa katatapos na ikatlong State of the Nation Address (SONA) ni Pangulong Ferdinand “Bongbong” Marcos, Jr.
Inaasahan ni Briones na mabanggit sa SONA ng Pangulo ang isyu tungol sa anti-agricultural Economic Sabotage Act ngunit kahit na isang salita ay walang binanggit ang Pangulo.
Magugunitang noong Mayo ay niratipkahan na ng senado at mababang kapulungan ng kongreso ang naturang batas ngunit hanggang ngayon ay tila wala pa ito sa tanggapan ng Pangulo, bagay na kanyang ipinagtataka.
Dahil dito may kutob si Briones na ‘na-hostage’ ang naturang panukalang batas lalo’t may sangkot na malaking halaga na posibleng tamaan ng naturang batas.
Gayonman, tumanggi na si Briones na tukuyin kung sino ang nasa likod ng pagkaka-hostage.
Ngunit naniniwala siyang kung walang kamay na gumalaw laban dito ay malamang na napirmahan na ng Pangulo at naging ganap na batas na.
Tinukoy ni Briones na ang naturang panukalang batas ang magbibigay babala laban sa mga smuggler, hoarder, at profiteer upang tumigil sa kanilang mga maling gawain na malaking kawalan sa kita ng pamahalaan at kapakinabangan ng mga mamamayan.
Sa ilalim ng panukalang batas, sinomang mapapatunayng sangkot sa smuggling, hoarding, at profiteering ay mananagot sa batas maging ang kanilang mga broker, storage, at ang iba pang mga gamit ay maaaring komposkahin ng pamahalaan.
Nakapaloob sa naturang batas na maaaring makulong nang habangbuhay ang maparurusahan bukod sa multang tatlong beses ng katumbas na halaga ng nakompiska o nahuling kargamento.
Ngunit inilinaw ni Briones, sa kabila nito ay masaya sila sa SONA ng Pangulo na nagbigay ng pagpapahalaga sa agrikulutura at pag-asa sa mga magsasaka, mangingisda, at livestock industry.
Inaasahan ni Briones na sa susunod na buwan ay lalabas na ang bakuna laban sa African Swine Flu (ASF) na malaking tulong sa industriya ng pagbababoy.
Kaugnay nito, pormal na sumulat si Briones sa Pangulong Marcos upang ipabatid ang tungkol sa naturang panukalang batas na niratipikahan na ng dalawang kapulungan ng kongreso. (NIÑO ACLAN)
