HATAW! D'yaryo ng Bayan hatawtabloid.com
KAKAIBANG Jason Dy ang maririnig ngayon sa R&B dance song na Ulit-ulit, ang una niyang patikim bilang bagong miyembro ng Star Music family.
Inilunsad ni Jason ang kantang ito noong March 1, eksaktong walong taon pagkatapos niyang magwagi bilang The Voice Philippines season 2 champion.
Sa bagong era ng kanyang music career, handa na ang tinaguring Prince of Soul ng bansa na ibida ang bago niyang tunog sa pamamagitan ng pagsubok sa ibang music genres na iba sa nakasayanang tunog ng kanyang fans.
Kasama na rito ang nakaiindak na Ulit-ulit na tungkol sa pagkadesmaya sa paulit-ulit na pagtatalo ng dalawang tao na may ugnayan.
“The song talks about that point in the relationship where the fights are getting repetitive. Pare-parehas lamang ang argumento at wala namang nare-resolve,” kuwento ni Jason.
“Tungkol ito sa kung karapat-dapat pa bang isalba ang isang relasyon or kailangang tapusin na,” dagdag niya tungkol sa awiting isinulat niya ilang taon na rin ang nakalilipas.
Magiging bahagi ang Ulit-ulit ng mini-album ni Jason na nakatakdang ilabas ngayong taon sa ilalim ng Star Music.
Pakinggan ang Ulit-ulit ni Jason na available na ngayon sa iba’t ibang music streaming platforms. Para sa ibang detalye, sundan ang Star Music sa Facebook, Twitter, Instagram, Tiktok, at YouTube.
