Floyd Mayweather walang balak mag-artista   

COOL JOE!
ni Joe Barrameda

LINGID sa kaalaman ng iba ay tahimik na dumating dito sa Pilipinas ang world boxing icon na si Floyd Mayweather bilang bisita ng Frontrow na pinamumunuan ni RS Francisco at Sam Versoza. 

Si Floy na may nickname na Money ay tatlong taon nang endorser ng Frontrow at sa pagbabalik niya sa Pilipinas ay ay pumayag na maging endorser din ng AQ Prime na mga sari-saring entertainment ang ibibigay sa taong magsu-subscribe sa kanilang app. 

Pumayag si Floyd sa AQ Prime dahil sa magandang advocacy nito. Hindi basta-basta tumatanggap ng endorser si Floyd at kailangan munang ipaliwanag sa kanya ang layunin ng isang organization at makumbinsi siya sa layunin nito.

Sa kuwento ng boxing icon, maituturing niya ang Pilipinas na second country niya after USA. Napakaganda raw ng Pilipinas at very warm at mababait ang mga Pinoy. 

Pinuri niya ng bonggang-bongga ang Okada Hotel kung saan siya nanunuluyan habang nandito sa Manila. Napakabait at maasikaso raw ang mga staff ng nasabing hotel. Nag-iisip siya na mamuhunan dito sa Pilipinas. Kung matuloy man tiyak na matutuwa ang Pangulong Bongbong Marcos dahil isa ito sa mga agenda niya na imbitahan ang mga foreigner na mag-invest sa Pilipinas.

Kung may panahon siyang makausap ang ating boxing legend na si Manny Pacquiao, gusto ni Floyd na magkasama silang magbukas ng isang training school para sa mga amateur boxers na marami ang tiyak na matutulungan. 

Kahit sikat na sikat si Floyd sa buong mundo, hindi pumasok sa isip niya na mag-artista o maging singer kahit maraming lumalapit sa kanya. Maligaya na raw siya sa natamo niyang karangalan at ok na siya rito. 

Hindi lang namin alam hanggang kailan si Floyd dito at mag-iikot pa siya sa iba’t ibang ilsla rito sa atin.