Inatadong lalaki sa Montalban kinilala ng misis

DIREKTANG kinilala ng asawang si Nerissa Rosales, 34 anyos, na mister niya ang may-ari ng putol-putol na katawan at ulo na natagpuan noong 17 Marso ng umaga sa Zigzag Road, Don Mariano Ave., Rodriguez (Montalban), Rizal.

Sa ulat ni P/Lt. Col. Marcelino Pipo, Jr., hepe ng Rodriguez MPS, kinilala ni Nerissa ang biktimang mister na si Ramil Jugar, 38 anyos, nakatira sa Apartment B, Aguinaldo St., Brgy., Muzon, Taytay, Rizal.

Ani Pipo, nagsasagawa pa sila ng malalimang imbestigasyon para matukoy at mahuli ang mga suspek sa brutal na pagpatay sa biktima.

Dagdag ng opisyal, maaaring matindi ang galit ng mga suspek sa karumal-dumal na krimen.

Matatandaang natagpuan ang hiwa-hiwalay na katawan ng biktima na nakalagay sa itim na garbage bag sa nabanggit na bayan noong nakaraang Huwebes. (EDWIN MORENO)