Presyo ng petrolyo muling magtataas

NAG- ABISO ang mga lokal na kompanya ng produktong petrolyo para sa dagdag na presyong ipatutupad ngayong araw ng Martes, ang ika-8 sa sunod-sunod na pagtataas ng presyo ng langis simula nitong Enero 2022.

Ayon sa Petron Corp., Pilipinas Shell, at Seaoil Philippines, magtataas sila ng kanilang presyo ng P0.80 kada litro ng gasolina,

P0.65 sa diesel, at P0.45 sa kerosene, dakong 6:00 am kaninang umaga.

Unang nag-anunsiyo ang Chevron Philippines ng parehong halaga ng dagdag presyo na ipatutupad pagtuntong ng 12:01 am ngayong Martes.

Parehas ang halaga ng itataas sa pump prices ng diesel at gasoline products ng PTT Philippines, Phoenix Petroleum, Total Philippines, Unioil Philippines at Petro Gazz, dakong 6:00 am, Martes, habang 4:01 pm, ng parehong araw, iiral ang dagdag presyo ng kompanyang Clean Fuel. (GINA GARCIA)