HATAW! D'yaryo ng Bayan hatawtabloid.com
NASAKOTE ang anim katao kabilang ang tatlong nakatalang high value individual (HVI) habang nasamsam ang halos kalahating milyong pisong halaga ng hinihinalang shabu sa dalawang magkahiwalay na anti-illegal drug operation na isinagawa ng mga tauhan ng Manila Police District (MPD) Police Station 13 sa Baseco Compound, Port Area, sa lungsod ng Maynila.
Ikinasa ang mga operasyon sa pangangasiwa ni P/Lt. Col. Rommel Anicete upang sugpuin ang pagkalat ng ilegal na droga sa lugar.
Isinagawa ang unang operasyon sa Block 15-A na nagresulta sa pagkakadakip ng tatlong suspek na kinilalang sina alyas Sam, 23 anyos; alyas Amor, 25 anyos; at Sara, 29 anyos, pawang mga residente sa nabanggit na lugar, nakatalang mga HVI.
Nasamsam mula sa mga suspek ang halos 62 gramo ng hinihinalang shabu na nagkakahalaga ng P421,600.
Nahaharap ang mga suspek sa mga kasong paglabag sa Section 5 (sale of illegal drugs) at Section 11 (possession of illegal drugs) ng RA 9165 o Comprehensive Dangerous Drugs Act of 2002.
Sa hiwalay na operasyong ikinasa sa Block 1, Gasangan, Baseco, nasakote ang tatlo pang suspek sa pinaigting na pagpapatrol ng pulisya at pakikiisa ng komunidad.
Kinilala ang mga suspek na sina alyas Jr, 30 anyos; alyas Beth, 21 anyos; at alyas Mac, 23 anyos, na nahulihan ng P68,000 halaga ng hinihinalang shabu sa kanilang pag-iingat.
Nahaharap ang mga suspek sa mga kasong paglabag sa Section 11 ng RA 9165 o Comprehensive Dangerous Drugs Act of 2002) at kasalukuyang nasa kustodiya ng MPD Police Station 13.
