P200-M produktong tabako, manufacturing machines kompiskado sa Tanza, Cavite

SA PATULOY na operasyon ng mga awtoridad laban sa nga ilegal na sigarilyo, nakompiska ng Bureau of Customs (BoC), katuwang ang Armed Forces of the Philippines (AFP), Philippine National Police (PNP), at Department of the Interior and Local Government (DILG), ang tinatayang nasa P200 milyong halaga ng illicit cigarette, manufacturing equipment, at raw materials, sa isinagawang joint inter-agency operation sa Cavite.

Sa pahayag, nabatid na ang operasyon ay isinagawa ng BoC, alinsunod sa Letter of Authority No. 02-18-023-2026 at Mission Order No. 02-18-028-2026, nang makatanggap ng intelligence information na nagsasaad ng posibleng paglabag sa Republic Act No. 10863, o The Customs Modernization and Tariff Act (CMTA), at Republic Act No. 12022, o mas kilala sa tawag na Anti-Agricultural Economic Sabotage Act.

Dagdag na ulat ng BoC, ang joint operation na pinangunahan ng kanilang Intelligence Group, sa pamamagitan ng Customs Intelligence and Investigation Service (CIIS), ay sinuportahan ng mga elemento ng AFP Intelligence Units, PNP-CALABARZON, Criminal Investigation and Detection Group – Cavite, Bureau of Fire Protection-Tanza, at Local Government Unit ng Tanza, ay ikinasa sa isang warehouse na dating ginagamit bilang imbakan ng mga delata.

Sa inisyal na pagtaya, kabilang sa mga nakompiska ay 11 suspected cigarette manufacturing machines, dalawang generator sets, isang forklift, at 10 brands ng mga finished cigarette products, kabilang ang Champion, Marl­boro, Canon Menthol, New Orleans, Bros, New Berlin, Commando, Delta, at Troy, na sasailalim sa final inventory at verification.