Remolino, Seda-Lomboy namayagpag sa NAGT elite

SUBIC BAY, Zambales – Walang kupas si Cebu pride Kim Andrew Remolino matapos ipagtanggol ang kanyang men’s elite crown sa National Age Group Triathlon (NAGT) nitong Linggo sa Subic Bay Freeport Zone sa Zambales.

Tumawid sa finish line ang University of San Carlos sophomore sa bilis na 56 minuto at 17 segundo sa matinding sprint race na may 750m swim, 18km bike at 5km run. Pinaikli sa 18km ang bike mula sa 20km dahil sa road repair, pero hindi ito naging hadlang sa ratsadang takbo ni Remolino!

Dikit ang laban nina Matthew Justine Hermosa (56:21) na sumegunda at Dayshaun Karl Ramos (56:44) para sa pangatlong puwesto.

“Nagpunta ako rito na handa at masaya ako sa resulta,” saad ni Remolino.

Sasabak naman sina Remolino at Hermosa sa PRISAA regional qualifying sa Marso 13-14 sa Tagbilaran City, Bohol.

Sa women’s elite, wagi si Dhana Victoria Seda-Lomboy matapos itala ang 1:07:49 at talunin si Lady Samantha Jhunace Corpuz (1:08:42).

Sa junior elite, rumatsada si Darell Johnson Bada upang angkinin ang ginto sa oras na 56:57. Pangalawa si Euan Arrow Ramos (58:57) at pangatlo si Peter Sacho Del Rosario (59:12).

“Palagi kong ibinibigay ang best ko sa bawat karera,” ani Bada.

Sa girls’ division, nanguna si Anisha Eunice Caluya (1:07:09), kasunod sina Christy Ann Perez (1:07:56) at pangatlo si Aira Danara Gregorio (1:08:38) na sinuportahan ng Philippine Sports Commission at Subic Bay Metropolitan Authority Tourism. (TriPhil/HNT)