Pasay city mayor kinompirmang muling nagpositibo sa CoVid-19

NAGPOSITIBO muli sa corovirus disease 2019 (CoVid-19) nitong Linggo si Pasay City Mayor Emi Calixto-Rubiano, kinompirma kahapon 2 Enero ng isang opisyal ng Pasay City government.

Nasa isolation ngayon ng hindi binanggit na health facility ang alkalde ng lungsod.

Wala rin binanggit ang kanyang chief of staff na si Peter Eric Pardo, kung anong uri ng variant ang nakahawa kay Rubiano ngunit sinabing “she is symptomatic.”

Ayon kay Pardo, sumama ang pakiram­dam ng alkalde noong Sabado ng nakaraang linggo. Sumakit ang lalamunan o nakaranas ng sore throat.

Aniya, si Mayor Rubiano ay agad sumailalim sa RT PCR test at nagpositibo sa CoVid-19.

“The mayor will continue to discharge her functions as the local chief executive, and will hold online meetings while she recuperates,” ani Pardo.

Matatandaan, noong Pebrero 2021 unang nagpositibo sa virus si Rubiano.

 (GINA GARCIA)