HATAW! D'yaryo ng Bayan hatawtabloid.com
SHOWBIZ KONEK
ni Maricris Valdez Nicasio
NAKATULONG siguro talaga ang pagkakaroon ng asawa at pagiging matured kapwa nina Toni at Alex Gonzaga kaya’t wala na silang awkwardness kapag magkasama sa trabaho.
Kung noo’y nariringgan natin ng reklamo si Toni ukol kay Alex na medyo pasaway at makulit, ngayo’y wala na sa ginawa nilang pelikulang The ExorSis, isa sa Metro Manila Film Festival entrie na mapapanood simula December 25 na idinirehe ni Fifth Solomon at handog ng Viva Films at TinCan Productions.
“Naku, at this point sa buhay namin wala na siguro kaming ganoong awkwardness. Mas more on nag-e-enjoy kami ‘pag magkakasama kami,” ani Toni.
“Wala namang awkward, siguro magiging awkward lang ako sa ate ko kung ang role namin ay mag-girlfriend , nakahubad kami tapos naghahalikan, other than that, wala naman,” seryosong sagot naman ni Alex.
At bagamat may kanya-kanya ng pamilya sina Toni at Alex, walang nabago sa kanilang closeness.
“Lagi kaming may time ni Alex for each other, kasi I think nakatulong din na dalawa kami, so talagang ‘yung bond na nabuo namin, connected na talaga kami kahit magkalayo kami. We may not be physically together all the time, pero ‘yung communication namin, laging tuloy-tuloy.
“So, lagi kaming updated sa mga pangyayari sa buhay ng bawat isa, ‘yung mga milestone, kung anuman ‘yung mga pinagdaraanan ng bawat isa, lagi kaming present,” kuwento ni Toni.
Sinabi rin ni Alex na walang nabago sa pagtitinginan nilang magkapatid. Katunayan, si Toni ang una niyang sinabihang buntis siya at ito rin ang nakaalam nang magkaroon siya ng miscarriage.
Samantala, ate ni Alex pa rin ang role ni Toni sa pelikula at bestfriend nila si Melai Cantiveros. Si Toni ay masyadong goal driven at focus sa pangarap na nang namatay ang parents nila, siya ang sumalo ng responsibilidad bilang nanay ni Alex na hindi niya nagustuhan. Si Alex si Dani na sasapian ni Lengleng. Hinahanap niya ang pagmamahal ng kanyang kapatid na hindi niya nararamdaman dahil hindi siya nito pinapansin dahil bitter ito sa kanya.
Mapapanood ang The ExorSis sa December 25-January 7, 2022 handog ng TinCan Productions at Viva Films.
