Sa trust rating survey
PRRD NANGUNA, VELASCO MULING NANGULELAT

KULELAT na naman si House Speaker Lord Allan Velasco sa trust rating survey na isinagawa ng Publicus Asia, Inc.

Nakakuha lamang si Velasco ng 12.067 porsiyentong high trust rating at 35.8 porsiyentong low trust rating.

Ang nakuha ni Velasco sa survey na isinagawa noong 11-18 Oktubre ay mas mababa sa kanyang nakuha sa mga naunang survey ng Publicus.

Sa second quarter survey ngayong taon na isinagawa mula 13-19 Hulyo 2021, si Velasco ay nakakuha ng 13.93 porsiyentong high trust rating at 36.27 porsiyentong low trust rating.

Sa first quarter survey ngayong 2021 na isinagawa mula 20-29 Marso 2021 ay nakakuha si Velasco ng 14.53 porsiyentong high trust rating at 35.33 porsiyentong low trust rating.

Sa huling survey ng Publicus noong 2020, nakakuha si Velasco ng 18.13 porsiyentong high trust rating at 30.20 porsiyentong low trust rating.

Sa October 2021 third quarter survey, nakapagtala si Pangulong Rodrigo Duterte ng 52.93 porsiyentong high trust rating at 23.6 porsiyentong low trust rating. Sumunod sa kanya si Vice President Leni Robredo na may 22 porsiyentong high trust rating at 46 porsiyentong low trust rating.

Si Senate President Tito Sotto ay nakakuha ng 19.8 porsiyentong high trust at 35.2 porsiyentong low trust rating samantala si Supreme Court Chief Justice Alexander Gesmundo ay nakapagtala ng 14.6 porsiyentong high trust rating at 29.6 porsiyentong low trust rating.

Walang nagkomisyon sa Publicus upang gawin ang survey. Mayroon itong 1,500 respondents. (HATAW News Team)