HATAW! D'yaryo ng Bayan hatawtabloid.com
MAS paiigtingin ng Philippine Iron and Steel Institute (PISI) ang kampanya laban sa substandard at unmarked reinforced steel bars matapos matuklasang may panibagong batch ng rebars ang nagkalat mula sa mga kahina-hinalang manufacturer.
Agad ipinagbigay-alam ni PISI vice president for technical affairs Joel Ronquillo sa Department of Trade and Industry (DTI) na ang substandard rebars ay iniulat na mula umano sa Real Steel Corp at Metrodragon Steel na makikita sa hardware stores sa Central Luzon.
“Unmarked rebars along with rebars embossed with non-registered logos were also found. These rebars are banned because their manufacturer cannot be identified, traced and sanctioned,” ani Ronald Magsajo, PISI president.
Kaya’t iginiit ni Magsajo, paiigtingin ng PISI ang kanilang test-buy operations at mahigpit na makikipagtulungan sa DTI upang masawata ang ganitong uri ng malpractice at upang maprotektahan ang publiko.
Kamakailan, nakakuha ng rebars samples ang PISI mula sa hardware stores at ipinadala ito sa Bureau of Philippine Standards upang masuri ng Metals Industry Research and Development Center (MIRDC).
Base sa findings ng MIRDC, ang taas ng lug at mass variation ng bakal ay hindi sumunod sa itinakda ng DTI na matiyak ang integridad ng rebars para sa gagamitin sa construction.
Nauna nang dumaan sa pagsusuri ng MIRDC ang mga bakal na gamit ng Real Steel, Metrodragon Steel at Philippine Koktai Metal noong Hunyo at napatunayan na undersized ang rebars na ibinebenta nito sa Central Luzon.
Gayondin, bigo ang mga nasabing kompanya sa itinatakdang standard ng Philippine National Standard (PNS) para sa rebar na maaaring magdulot ng panganib sa mga gagamit nito para sa construction.
“Some manufacturers and traders are taking advantage of quarantine restrictions and taking shortcuts that ultimately will harm the end-user,” diin ni Magsajo.
“Low mass variation, for instance, is like asking someone to pay for 1 kilo of steel and only getting 900g,” dagdag ni Magsajo.
(NIÑO ACLAN)
