HATAW! D'yaryo ng Bayan hatawtabloid.com
PINABABANTAYAN ni Senator Juan Edgardo “Sonny” Angara sa mga kapwa senador ang deliberasyon ng budget ng Department of Health (DOH) para sa susunod na taon.
Sinabi ni Angara, chairman rin ng committee on finance, ito ay bunsod ng mga isyu na patuloy na nakaugnay kay Health Secretary Francisco Duque III.
Ayon kay Angara, magiging factor ng Senate approval sa 2021 budget ng DOH ang magiging tugon sa hihingin nilang mga detalye tungkol sa pamumuno at accountability ng kalihim sa mga issue ng ahensiya.
Inilinaw ng senador na mananatiling prayoridad ng kanilang deliberasyon ang pangangailangan ng publiko, at hindi ito iipitin dahil kay Duque.
Sa ilalim ng panukalang budget ng DOH, P203 bilyon ang hinihinging pondo ng tanggapan para sa susunod na taon. Pasok dito ang higit P71 bilyong alokasyon sa kontrobersiyal na attached-agency — ang Philippine Health Insurance Corp., (PhilHealth).
Kung maaalala, nadawit ang pangalan ni Duque sa umano’y katiwalian sa loob ng state-health insurer.
Kamakailan inirekomenda ng Senado na isama si Duque sa mga opisyal na asampahan ng kaso kaugnay ng kontrobersiya.
(CYNTHIA MARTIN)
