Jeep, truck nagbanggaan… Contractor, estudyante patay, 18 sugatan

DALAWANG pasahero ang namatay habang 18 iba pa ang sugatan nang bumangga ang kanilang sasakyan sa hulihang bahagi ng nakaparadang truck kamakalawa ng gabi, 4 Marso, sa Marcos Highway, Barangay dela Paz, sa lungsod ng Pasig.

Kinilala ang dalawang namatay na sina Joseph Andaya, 45 anyos, contractor, residente sa lungsod ng Caloocan; at Jenny Ann Colinares, 21 anyos, estudyante, nakatira sa lungsod ng Pasig.

Sa imbestigasyon ng mga awtoridad, dakong 11:25 pm, sakay ang 20 pasahero ng jeep, may plakang TVJ 443 patungong Cubao at minamaneho ni Jay-r Labitag nang sumalpok sa nakaparadang dump truck na minamaneho ni Crisanto Salvador, 41 anyos, sa Marcos Highway, sa harap ng Ayala Mall Feliz, sa lungsod ng Pasig.

Nabatid mula sa mga awtoridad na mabilis ang takbo ng jeep at sa lakas ng pagbangga ay nasaktan ang mga pasahero.

Namatay ang dalawang biktima sa Amang Rodriguez Medical Center habang kasalukuyang ginagamot ang 18 iba pa.

Kapwa hawak ng pulisya ang driver ng jeep at truck na posible umanong maharap sa kasong double homicide at multiple physical injuries. (EDWIN MORENO)