HATAW! D'yaryo ng Bayan hatawtabloid.com
NADAKIP ang isang 24-anyos lalaki na inireklamong nanghipo ng dibdib ng 21-anyos dalagang estudyante sa loob ng isang pampasaherong jeep noong Biyernes ng hapon, 21 Pebrero, sa lungsod ng Marikina.
Kinilala ng pulisya ang arestadong suspek na si Elijio Rosario, 24 anyos, walang trabaho, habang itinago sa pangalang ‘Lorna’ ang biktima, isang part time student.
Ayon sa mga awtoridad, dakong 4:00 pm noong Biyernes, kapwa sakay ang biktima at suspek sa isang pampasaherong dyip nang biglang manggigil ang suspek saka nilamas ang dibdib ng dalaga sa bahagi ng flyover sa Marcos Highway.
Dahil sa takot, hindi pumalag ang biktima na inakala ng manyakis na pumapayag sa pangmamanyak na kanyang ginawa.
Pagsapit sa Cubao area, bumaba ang suspek at nag-‘goodbye kiss’ pa umano sa biktima.
Lingid sa kaniyang kaalaman, sinundan siya ng dalaga at nang makakuha ng tiyempo nagsisigaw ito at humingi ng saklolo.
Agad na dinakip ng security guard na si Fructoso Heronan ang suspek nang dumaan sa tapat niya saka dinala sa Cubao Police Station (PS7) ng Quezon City Police District (QCPD).
Ilang saglit pa’y dinala ang suspek sa Women’s Desk ng Marikina PNP na may hurisdiksiyon sa kaso.
Nakapiit na ang suspek sa detention cell at nahaharap sa kasong act of lasciviousness.
(EDWIN MORENO)
