HATAW! D'yaryo ng Bayan hatawtabloid.com
PATAY ang isang tauhan ng San Juan PNP na nakatalaga sa anti-drug operations, nang barilin ng security guard kamakalawa ng gabi sa San Juan City.
Sa ulat ng Eastern Poplice District (EPD), kinilala ang biktimang si SPO2 Abundio Panes, operatiba ng Police Station 4 at miyembro ng Station Anti-Illegal Drugs (SAID) ng San Juan City Police.
Sa imbestigasyon, dakong 8:45 pm nagkaroon ng komosyon malapit sa San Juan Coliseum dahil hinahabol ni Panes ang isang lalaki na kinilalang si Manuel Obar Llangos alias Manoling.
Si Llangos, sinasabing isang drug pusher sa Brgy. Batis ng lungsod, ay hinabol ni Panes at binaril kaya tinamaan.
Ngunit nang makita ni Louie Magdag, miyembro ng intelligence security office ng sabungan, si Panes na may hawak na baril ay pinaputukan ang pulis na nagresulta sa kanyang pagkamatay.
( ED MORENO )
