Boto bantayan — Bongbong (Hanggang sa huling sandali)

ISANG linggo bago ang halalan sa Mayo 9, nananawagan si vice presidential candidate Ferdinand “Bongbong” Marcos, Jr. sa publiko na bantayang mabuti ang kanilang boto upang matiyak na ang mananaig ay kagustuhan ng mayoryang botanteng mamamayang Filipino.

Ayon kay Marcos, dapat ay hanggang sa huling sandali ng bilangan hanggang sa iproklama ang tunay na nanalo sa ano mang posisyon ay dapat nakabantay at nakatuktok ang sambayanang Filipino upang sa ganoon ay hindi magtagumpay ang ano mang balaking mandaya.

Aminado si Marcos, malakas ang kanyang kutob na mayroong ibang mga grupo na nagbabalak na mandaya masiguro lamang na manalo ang kanilang kandidato.

Magugunitang sa nakaraang absentee voting ay ilang mga Overseas Filipino Worker (OFWs) ang umangal dahil iba ang lumalabas sa resibo kompara sa tunay nilang ibinotong kandidato.

Habang ipinagtataka ni Marcos kung bakit ang kandidatong Marcos at Romualdez lamang ang botong nawawala at napapakialaman gayong marami namang kandidato.

Sa kabila nito, masaya pa rin si Marcos dahil sa natanggap niyang ulat na maganda ang resulta ng halalan ng mga OFW.

Binigyang-linaw  ni Marcos, walang sino man sa kanilang mga kumakandito ang maaaring magsabing siya ay panalo hanggang sa hindi pa tuluyang siya ay naipoproklama.

Tinukoy pa ni Marcos, kung minsan pa nga ay naiproklama na nababawi pa at natatalo pa ng kalaban.