PCU pinagpag ang AMA

Nagpaputok ng 18 three-point shots ang dating  NCAA champion Philippine Christian University-Lilac Experience upang paluhurin ang AMA-Wang’s Ballclub , 124-102, sa  2016  MBL Open basketball championship sa EAC Sports and Cultural Center sa Manila.

Hindi masyadong nahirapan ang PCU sa kanilang panalo dahil sa tinikada ni Mike Ayonayon ang 29 puntos, kasama ang pitong three-pointers habang may apat na triples naman si Von Tambeling para sa kanyang 24 points.

Nag-ambag din si Fidel Castro ng 15 puntos para sa Dolphins na ginagabayan ni multi-ttilted coach Ato Tolentino.

Tinapatan ng  PCU ang baraha ng Macway  Travel Club na  4-1 win-loss sa eight-team, single-round tournament na sinusuportahan ng Smart Sports, Ironcon Builders,  Bread Story, Dickies Underwear, PRC Couriers at Gerry’s Grill.

Nasayang naman ang conference-tying high 34 puntos ni Federico Alupani dahil hindi nito naakbayan ang AMA-Wang’s sa panalo. ( ARABELA PRINCESS DAWA )