2 frat member habambuhay sa hazing

WALA nang lusot sa habambuhay na pagkabilanggo ang dalawang brod ni Vice President Jejomar Binay sa Alpha Phi Omega (APO) fraternity na hinatulan ng mababang hukuman dahil sa pagkamatay ng isang estudyante ng University of the Philippines Los Baños, na si Marlon Villanueva sa hazing noong 2006.

Ito ay makaraan pagtibayin ng Kataas-taasang Hukuman ang hatol na ipinataw ng Calamba Laguna Regional Trial Court Branch 36 laban kina Dandy Dungo at Gregorio Sibal Jr.

Ito ang kauna-unahang conviction na ipinataw sa ilalim ng Republic Act 8049 o Anti-Hazing Law.

Sa 39-pahinang desisyon na isinulat ni Associate Justice Jose Mendoza, pinaboran ng Supreme Court Second Division ang hatol na reclusion perpetua laban kina Dungo at Sibal, Jr.

Alinsunod sa desisyon ng mababang korte, napatunayan ng prosekusyon na kasama ng biktima sina Dungo at Sibal nang pumasok sa isang resort kung saan naganap ang initiation rites.

Sa records ng kaso, ang dalawang akusado rin ang nagdala sa biktima sa JP Rizal Hospital.

Nakasaad sa hatol na bagama’t walang ebidensiya na kasali sina Dungo at Sibal sa initiation rites, may ebidensiya na ang dalawa ang nagdala sa biktima sa lugar kung saan naganap ang initiation rites na nagresulta sa pagkamatay ni Villanueva.

Matatandaan, unang kinatigan ng Court of Appeals  (CA) ang desisyon ng mababang hukuman kaya umapela sina Sibal at Dungo sa Korte Suprema.

Ngunit sa desisyon ng SC, nilinaw na kahit walang patunay na kasali ang dalawa sa initial rites, hindi mangyayari ang hazing kung hindi nila dinala si Villanueva sa nasabing lugar.