Lady vendor naglason

PATAY ang isang 33-anyos babaeng vendor makaraang uminom ng lason sa loob ng inuupahan niyang bahay sa Caloocan City kamakalawa ng gabi.

Hindi na umabot nang buhay sa Philippine General Hospital (PGH) ang biktimang kinilalang si Roselle Eugenio, residente ng 155 Gen. San Miguel St., Brgy. 4, Sangandaan ng nasabing lungsod, makaraan uminom ng silver cleaning solution.

Batay sa ulat ng pulisya, dakong 10 p.m. nang makarinig ang mga kapitbahay ng kalabog mula sa inuupahang silid ng biktima.

Agad itong ipinagbigay-alam sa mga kaanak ng biktima at nang puntahan ay tumambad sa kanila ang nakahandusay na si Eugenio at nakita sa kanyang tabi ang bote ng panlinis ng silver.

Patuloy ang imbestigasyon ng mga awtoridad upang mabatid kung sadyang nagpakamatay ang biktima o may naganap na foul play sa insidente.

Ayon sa mga kaanak, wala silang nalalaman na ano mang problema ng biktima na maaaring dahilan ng kanyang  pagpapakamatay.