Comelec uupa ng 93K OMR machines

IMBES kumpunihin ang mga sirang precinct count optical scan (PCOS) machines ay uupa na lamang ng 93,000 optical mark readers (OMR) ang Commission on Elections (Comelec).

Sa pulong balitaan, sinabi ni Comelec Chairman Andres Bautista, ang pagrenta ng mga makina ay higit na matipid kompara sa iba pang proseso.

Aniya, safe din ito dahil sa security features ng computer system at ng mismong mga unit.

“This is the most viable, practical, safest way to ensure credible 2016 elections,” wika ni Bautista.

Dagdag ng Comelec head, dumaan sa konsultasyon ang bawat panukala para sa 2016 polls at tanging ang pag-upa ng OMR ang ‘unanimous’ na pinaboran ng mga opisyal ng Comelec.

Una rito, inamin ng komisyon na kinakapos na sila ng panahon para sa election preparation makaraan harangin ng Korte Suprema ang deal nito sa Smartmatic-TIM.